Tysdag 29. november vert det klart kven som får
fylkeskulturprisen i år. Heile 36 kandidatar er føreslegne
til årets fylkeskulturpris. Enkelte har vore foreslått før,
andre er nye av året. Felles for alle er at dei har gjort og
gjer ein stor innsats for eit mangfaldig kulturliv i fylket.
Eller har dei det? Nyleg gjekk diskusjonen friskt om korvidt
gullstrupen frå Sogn, Tone Damli, var verdig ein nominasjon.
No vil diskusjonen garantert blusse opp att, etter at den
fullstendige kandidatlista blei klar.
Frå Firdaposten sitt nedslagsfelt finst fire nominerte
kandidatar. Ein av dei er Frode Klokkernes, som er nominert
for sin mangeårige innsats for å dokumentere folkeliv og
natur i fylket vårt gjennom fotolinsa. Bremanger Musikklag
og Nesholmen leir i Hyen er nominert, og den fjerde
nominerte er kanskje meir overraskande: Veikingkonvoien.
Veikingkonvoien kasta loss første gong i 1997, og oppstod
som ein noko spøkefull kommentar til Vikingkonvoien, som
gjekk frå Florø og over til Shetland. Under kyndig leiing av
veikingadmiral Vidar Nupen, har arrangementet balla på seg
når det gjeld både innhald, humor og mediemerksemd. Men
sjela ligg fast; konvoirutene strekkjer seg sjeldan lenger
enn til Askvoll. Med ei deltakaravgift som blir
indeksregulert i takt med kostnaden for A-post i Norge, har
det blitt eit folkeleg arrangement som alle har råd til -
sjølv dei med altfor dyre båtar.
Den 32. fylkeskulturprisen i rekkja blir delt ut på
fylkestinget 13. desember, og førstkomande tysdag avgjer
hovudutval for kultur kven som får prisen. "Våre" kandidatar
kan i år neppe reknast i favorittsjiktet. Det nærmaste ein
kjem er nok Bremanger Musikklag, som med sine inkluderande
musikalprosjekt har gjeve kulturlivet i bygda store løft og
jamvel nådd ut over fylkesgrensene med tiltaket.
Dei nominerte i år er:
Bethan Candice Bredesen, Eid
Stian Sjursen Takle/Stein Aase i NRK Sogn og Fjordane,
Lutt-redaksjonen
Gunnar Smaadal, Jølster
Helge Øren, Årdal
Førde Volleyballklubb, Førde
Gerd Brekke, Ortnevik
Kari Kvamme og Claus Kvamme, Fjærland
Olaug Nilsen, Førde (busett i Bergen)
Oddleiv Apneseth, Jølster
Synnøev S. Bjørset, Jølster
Terje Lyngstad, Førde
Steinar Sørli/Yngve Brakstad Leknes, Bygstad
Åmot operagard
Kari Standal Pavelich og Michael Pavelich, Nordfjordeid
Geir S. Hjetland, Kvamsøy
Magni Jensen, Kvamsøy
Hilde Bjørkum, Førde
Oddvar Torsheim, Førde
Ei ekte eldsjel (ikkje namngjeve framlegg)
Eva & The Heartmaker, Sogndal (busett i Oslo)
Norsk Kvernsteinsenter, Hyllestad
Frode Klokkernes, Florø
Veikingkonvoien, Flora
Arne M. Sølvberg og Asbjørg Hustveit Sølvberg, Blaksæter
Ove Henning Solheim, Førde
Nesholmen leirstad, Hyen
Tone Damli Aaberge, Sogndal (busett i Oslo)
Bremanger musikklag, Bremanger
Håkon Høgemo, Øvre Årdal (busett på Osterøy)
Rune Timberlid, Førde
Petter Eide, Sandane
Gloppebua, Sandane
Førde Trekkspelklubb, Førde
Fredagsdansen, Førde
Jølster Musikklag, Jølster
Oline Løvlid, Hornindal |
